Collegats - Principiants (4b+, 80 m, derrigorrez 4b) eta Eurónica (5b, 80 m, derrigorrez 4c)

Bertara azkar iristen den bi bide erraz eta ongi ekipatuak. Nahiz eta erlaitzetan harri solte ugari aurkitu, arroka kalitate handikoa da. “Eurónica” bidearen bigarren luzeko sabaia oso ongi ekipatuta dago eta estutasun batean, lasai-lasai, A0 modura egin daiteke. Bideak dituen norabide aldaketak direla eta ongi dator zinta luzeak eramatea. “Principiants” bidea lehenengo luzean dagoen txapa urdinarekin eta L2ko kanal nabariarekin erraz ezagutzen da.

Bi bideak elkartuz eskalada egun polita irteten da. Bi bideetan bilgune guztiak rapelatzeko prestatuta daude.

Iristeko eta hurbiltzeko: Ikus hurrengo sarrera.

Principiants (4b+, 80 m, derrigorrez 4b)

L1 (30 m, 1 aseguru, 3b). Erresalteak dituen plaka etzana. Luzean aurkituko dugun txapa baino lehen (lurretik 15 m ingurura dago) zuhaixka bat dago eta bertan zintaren bat ipintzeko aukera dago.

L2 (25 m, 5 aseguru, 4b). Hasieran kanal moduko bat pasagune finaren batekin. Ondoren eskuineko espoloira irten eta bilguneraino igo.

L3 (25 m, 3 aseguru, 4b+). Bilgunetik eskuin aldera irten, lurrak hartutako erlaitz handia zeharkatu eta pasagune finaren bat duen horma bertikal motz bati ekin.

Materiala: 5 zinta + bilgunerako materiala. Baga bat L1eko zuhaixkarako. Friendsak eta fisureroak soberan daude.

Arroka: Kareharria (konglomeratua).

Orientazioa: Hego-ekialdea.

Iraupena: 40min.

Nork irekia: J.M. Tunica, apirila 1997.

Eurónica (5b, 80 m, derrigorrez 4c)

L1 (25 m, 6 aseguru, 5b). Errepidean jaiotzen den ongi babesturiko 3 metro inguruko hormatxo bertikalarekin hasten da luzea. Erlaitz belartsu bat zeharkatu eta plaka etzan bati ekin ezkerretik hobeto gainditzen den sabai batera iritsi arte. Sabai gainditu ondoren plaka etzana bilguneraino.

L2 (30 m, 8 aseguru, 5b). Bolo handiz osatutako plakatik igo kanalaren erdian dagoen sabai azpian jarri arte. Hirugarren aseguruak A0 modura egitea baimentzen du. Bosgarren asegurutik aurrera 5 metro inguruko zeharkaldi bat egin behar da ezker aldera (ongi babestua). Plaka etzan batera irteten da. Eskuin aldera igo behar da (ez igo gure ezkerrean ikusiko ditugun aseguruen aldera, “Principiants” bidekoak dira). Marruskadura gutxitzeko ongi dator zinta luzeak eramatea.

L3 (25 m, 4 aseguru, 4b). Bilgunetik eskuin aldera irten, lurrez jantzia dagoen erlaitz handia zeharkatu eta sabaitxoak dituen hormatxo motz bati ekin. Hasieran eskuin aldera eginez igo behar da eta ondoren zuzen.

Jaitsiera: Bideetatik rapelatzen. R3tik R2ra jaitsi eta bertatik lurrera beste rapel batean (60 metroko 2 sokekin).

Materiala: 8 zinta + bilgunerako materiala. Zinta luzeak. Friendsak eta fisureroak soberan daude.

Arroka: Kareharria (konglomeratua).

Orientazioa: Hego-ekialdea.

Iraupena: 1h.

Nork irekia: J.M. Tunica, martxoa 2002.

Cambiar idioma (Castellano)