© X. Larretxea. Con la tecnología de Blogger.

2014/09/03

Txindokiko klasikoenetik klasikoena. Eskalada irteera bat baino mendi irteera modura har daiteke. Hurbilketa luzeak, eskalatzen amaitzen den tokitik gailurrera dagoen igoerak eta jaitsierak, ibiltzea eta eskalada konbinatuz, egun osoko irteera eder bat osatzen dute.
Luzeak nahiko motzak dira. Ez dago 30 metroko luzera gainditzen duenik. Beraz luze batzuk elkartzeko aukera dago, baina lepotxoetara jaisteko destrepe txiki batzuk dituen ertza denez, luzeak elkartzen badira gure bikotearekin komunikatzeko arazoak izan ditzakegu.
Bilguneak bi paraboltez osatuak daude. Luzeetan parabolteren bat eta iltze batzuk aurkituko ditugu. Azken hauek harkaitzarekin mimetizatzen direnez sarritan zaila da aurkitzea.
Eskalatzen berria den kideren bat badaramagu, lepotxoetara jaistea bigarrenari babestu behar zaiola gogoratu (friends edo fisureroren batekin). Jaitsiera errazak dira, baina bigarrenarentzat apur bat arriskutsuak izan daitezke ez bada ezer jartzen.
Bidean 4c mailako tarte bat eta 4b eta 4a-ko tarte pare bana aurkituko ditugu. Beste guztia II eta III. mailako pasagunez osatutako trepada bat da. Ia igoera guztia ertzaren ipar isuritik egiten da eta beraz, sarritan, hezea egoten da. Horrela bada, zati belartsuetan adi ibili behar da. Bidea jende askok egiten du. Beste soka-bikoteekin aurkitzen bagara, izan pazientzia pixka bat.

Iristeko: Amezketatik Abaltzisketara igo eta bertatik Larraitz auzora hurbildu. Dauden aparkalekuren batean kotxea utzi.

Hurbiltzeko: Txindokira doan bidetik igo pinudi bat hasten den tokian dagoen ataka metalikoa aurkitu arte. Ataka pasa eta hamar metro egin ondoren, atzera, eki aldera, egiten duen bidezidorra hartu behar da eta bide nagusia utzi. Bidezidorrak soro batera eramaten gaitu. Soro horretatik, aldapa gogor bati jarraituz, igo behar da. Ertzetik datorren lehenengo harkaitza bere ezkerretik inguratu ondoren Ameztiko lepora iritsiko gara. Hortik ertzaren oinarrira trepada (II) labur bat besterik ez zaigu geratzen.

L1 (20 m, 3 aseguru, 4b). Nahiz eta apur bat leunduak egon, euste leku oneko diedroa. Ertzera irteterakoan bilgunea aurkituko dugu.
L2 (30 m, 1 aseguru, II). Ertz erraza. Bilgunea lepotxo batean. Bertara destrepatu behar da.
L3 (30 m, 6 aseguru, 4a). Hasieran amildegian zintzilikatuta dagoen diedroa. Gero ertz erraz bat. Diedrora sartzea ematen duena baino errazagoa da, baina egia da , ezagutzen ezpada, inpresioa ematen duela.
L4 (30 m, 1 aseguru, 4a). Ertz zatitxo batek branka handiaren oinarrian uzten gaitu. Bere eskuinean euste-leku oneko, baina asegururik ez duen diedroa aurkituko dugu. Diedroa gainditzerakoan “plaka politaren” oinarrira iristen da. Bertan aurkituko dugu bilgunea.
L5 (20 m, 1 aseguru, 4b). Plaka labur bat eta ondoren ertz zatitxo bat. Lepotxora jaitsi. Gure bilgunea lepoaren ezker aldean kokatuta dago. Eskuineko horman zintzilik ikusten den bilgunea (2 parabolt katez elkartuak) ez da gure bilgunea.
L6 (20 m, 3 aseguru, 4c). Diedro motz bat. Bideko zatirik zailena da hori. Ongi babestua. Bilgunea, diedrotik ezkerrera irtenik, bigarren paraboltaren parean dago.
L7 (30 m, 3 aseguru, 3a). Eskuinetik ezkerrera diagonal bat eginez igotzen den zati belartsua. Bustia badago delikatua izan daiteke. Ertzera irteterakoan bilgune erosoa.
L8 (30 m, 0 aseguru, II). Trepada labur bat eta ondoren zeharkaldi horizontala rapelatzeko lerroa adierazten duen bilgunera iristeko (katez lotutako 2 parabolt eta eraztuna).

R7 bilgunetik (edo nahi izanez gero R8tik) sokatik askatu eta gailurrera oinez igo gaitezke. Horrek 30 minutuko igoera suposatzen du. Bidean II-III. mailako pasaguneak aurkituko ditugu (baten bat apur bat aereoa, baina euste leku onekin).



Jaitsiera: Gailurrera igotzen bada, Txindokiko bide arruntetik oinez jaisten da. Rapelatuz jaitsi nahi badugu 60 metroko bi soka beharko ditugu.

Materiala: 6 zinta + bilgunerako materiala. Friends edota fisurero joko bat ongi etor daiteke urrutiratzeren bat babesteko edo iltzeren bat aurkitzen ez denerako.

Arroka: Kareharria.
Orientazioa: Mendebaldea.
Iraupena: 2h.
1ª igoera: J.M. Peciña, J. Arrate eta A.S. Basagoitia, 1951.

Categories: , ,


Komentariorik egin nahi baduzu,hau da lekua.

4 comentarios:

  1. Oraindela gutxi, Txindokiko arista bilgune guztiak berriz ekipatu dituzte.

    ResponderEliminar
  2. Eskerrik asko informazioagatik. Ongi dago jakitea.

    ResponderEliminar
  3. Kaixo, udan txindokiko ertza egin gendun 60m-ko soka bikoitz batekin (doblean), hau da, 30m-ko birekin. Ez dakit ze luzetan baina denak ez dira 30m baino txikiagoak. Halere friends eta zintekin montatu genduzen bilerak, aukerak sobran dagoz eta.

    Ondo izan.

    ResponderEliminar
  4. Horrela izango da. Metro askorengatik izan zen? Nik egiten dudanean (eta aspaldi ez dudala errepikatu) 60 m sokak eramaten ditugu (eta gaur egun ere jendeak soka sinplea eramaten duenean gutxienez 50 m erabiltzea ohikoa izaten da) eta 5 m-ko aldeak ez du garrantzia handia izaten. Posible bazenu informazioa gehiago zehaztea eskertuko nuke (krokisa zuzentzeko gehien bat).

    ResponderEliminar