Ailefroide - Ecrins total (5c, 225 m, derrigorrez 5b) ~ Eskalatzen

FRANTZIA

Barre de los Ecrins y eta Pelvoux bailarak elkartzen diren tokian dago Ailefroide. Kanpin munizipal handi bat, aterpe bat, hainbat jatetxe eta denda pare bat daude. Mendizalez edo/eta eskalatzaileez betetako "kanpamentu basea" da. Errepideak kanpina zeharkatzen du eta beraz, jendearen kontrola ez da oso (ezinezkoa litzateke) zorrotza. Norabide guztietan eskalatzeko bideak aurkituko ditugu. Gehienak denda ipintzen dugun lekutik oinez ordu erdi edo gutxiagora daude.

Iristeko: Gap herritik Briançon aldera hartu (N94 errepidea). L´Argentière-la Bessée herrian sartu eta Les Vigneaux eta Vallouise aldera D994E errepidea jarraitu. Pelvoux herria zeharkatu eta kanpineko harrera aurkitu arte errepideari jarraitu.

Ecrins total (5c, 225 m, derrigorrez 5b)

Ailefroideko bide eskuragarrienetako bat. Bideak denetik dauka. Luze gogorrenak hirugarrena eta laugarrena dira. Granito trinkoz osatutako arroka ezin hobea. Arroka zuriz osatutako triangelu bereizgarriagatik bidea non dagoen berehala jakiten da.

Hurbiltzeko: Ibaia zeharkatzeko errepideak duen zubia baino lehen, ezkerrera, bidezidor bat jaiotzen da. Hori jarraitu behar da. Erreka bat zeharkatu ondoren, hondoan hormak ikusten direla, bidegurutze bat aurkituko dugu. Ezkerrekoa hartu. Zubitik 30 min inguru behar dira bidearen oinera iristeko.

L1 (35 m, 10 aseguru, 5b). Plaka zuri handiaren ertzetik igo. Ezkerreko hormara pasa eta hormatxo bat gaindituz bilgunera igo.

L2 (30 m, 7 aseguru, 4b). Grada modukoak dituen plaka.

L3 (35 m 9 aseguru, 5c). Kanalean sartzeko zeharkaldi motz bat hasieran. Gero zeharkalditxo batez bananduta kanpo aldera botatzen duten bi horma motz jarraian. Azkenik, bilgunera iristeko, itsasgarritasun pasagune finak dituen zeharkaldi horizontala. Bi hormak motzak dira eta ongi babestuta daudenez A0 moduan igaro daitezke. Kanalaren barruan, hirugarren aseguruaren alboan, spit bat ipinita dago eta beraz bilgune bat antolatzeko aukera egongo litzateke. Horrela zati horizontaleko 15 m horiek kentzen dira eta, nire iritziz, sokaren lehenengoa hobeto babesteko aukera egongo litzateke.

L4 (35 m, 11 aseguru, 5c). Itsasgarritasun plaka bertikal bat hasieran. Ezkerreko kanalera pasa eta sabai azpian dagoen plakatik igo. Azken zatian horma bertikal, baina euste-leku onak dituena, aurkituko dugu. Hori gainditzerakoan plakatxo batera irteten da eta hortik berehala bilgunera.

L5 (55 m, 5 aseguru, 5a). Espoloitxo baten azpitik eta ezker aldera igotzen den plaka etzana.

L6 (30 m, 7 aseguru, 4c). Kanal moduko plaka etzana hasieran, baina gero amaiera aldera tente jartzen dena. Azken metroetan, bilgunera iristeko, ezkerrera, gora jotzen duen, zeharkaldia egin behar da.

L7 (35 m, 7 aseguru, 5c). Sabai handiaren azpian jartzeko zeharkaldi horizontala ezkerrera. Sabaia bere ezkerretik igaro eta diedrotxo batzuk dituen horma bertikal batetik egingo dugu topo. Horma nahiko bertikala da eta kanpo aldera botatzen du, baina baditu euste-leku on batzuk progresioan laguntzen dutenak. Amaitzeko espoloi baten ertzetik doan plaka bat igaro behar da bilgunera iristeko.